O Centro de Investigación Mariña (CIM) da Universidade de Vigo é un dos oito Centros de Investigación do Sistema Universitario de Galicia (SUG), acreditados pola Consellería de Educación, Universidades e Formación Profesional da Xunta de Galicia en xaneiro de 2020, e cofinanciado pola Xunta e a UE a través dos fondos FEDER. No ano 2016, o CIM recibiu o distintivo de Centro Singular de Investigación de Galicia de 2016-2019, sendo o único centro mariño en Galicia con este recoñecemento. Esta distinción convérteo no elemento central da estratexia mariña do SUG, potenciando a súa capacidade para contribuír ao avance das ciencias e da educación oceánicas cunha parte sustancial do investimento autonómico en investigación. Desta forma, e tras unha longa andadura, o CIM logrou situarse como referente na xeración, transferencia e divulgación do coñecemento sobre o ecosistema mariño e costeiro e no desenvolvemento dun coñecemento azul sostible.
O CIM pon en marcha esta serie de actividades de balde co obxectivo de dar a coñecer a investigación mariña de vangarda que se leva a cabo na Universidade de Vigo e a súa importancia de cara á sociedade, así como as instalacións da Estación Ciencias Marinas de Toralla (ECIMAT) como principal infraestrutura de investigación do CIM. Tamén se procura divulgar aspectos científicos do medio mariño relacionados coa ría de Vigo. A participación nestas actividades implica necesariamente a autorización á organización para a obtención de fotografías e a gravación de vídeo, que serán utilizados nas webs da Universidade de Vigo e nas súas redes sociais.
Estas xornadas divulgativas terán lugar os días 22, 23 e 29 de outubro de 2021 e constará de tres actividades diferentes:
