ECOBAS é un Centro de Investigación Interuniversitario, integrado por académicos/as das tres universidades galegas, que traballa no eido da sustentabilidade económica, ambiental e social co obxectivo de dar resposta ós grandes retos e desafíos da sociedade, abordándoos dende o punto de vista da investigación, a docencia, a innovación e a transferencia de coñecemento.
A mellora do capital humano constitúe un dos retos fundamentais para calquera organización, e ECOBAS non é unha excepción. Por iso poñemos en marcha unha serie de seminarios, entre os que se atopan “libra de oficio”. A expresión “libra de oficio” provén do refrán popular “Máis vale libra de oficio ca arroba de terra”, o cal ten o mesmo significado que “O saber vale máis có haber” ou “O saber vale máis có ter”.
Este refrán, baseado en unidades de medición tradicionais, destaca o concepto de formación vinculado a ECOBAS (oficio – saber) e manifesta a súa importancia no estudo na economía e da creación de riqueza.
