Xornadas de Portas Abertas CINBIO 2021

O CINBIO celebra as súas xornadas de portas abertas durante a Semana da Ciencia (1 a 14 de novembro) co ciclo de actividades “Ciencia con C de CINBIO.”

 

A proposta deste Centro de Investigación da Universidade de Vigo (cofinanciado polo Programa Operativo FEDER-Galicia 2014-2020) consistirá na realización de diferentes actividades ao longo destes días, co obxectivo último de achegar a ciencia á sociedade e conseguir que se perciba como unha disciplina máis próxima en lugar da súa tradicional visión como un concepto afastado da poboación e pechado dentro dos laboratorios.

 

Así, “CINBIO na escola”, “CINBIO na rúa” e “Coñece o CINBIO” serán os tres bloques principais desta proposta, amosando un punto de inflexión con respecto as xornadas de portas abertas dos anos anteriores e volvendo á presencialidade, sempre respectando todos os protocolos de seguridade pola COVID-19.

‘CINBIO na escola’ – 2 de novembro de 2021

Unha proposta formativa para o alumnado dos institutos públicos de 4º da ESO e 1º de Bacharelato co fin de promover vocacións científicas entre os máis novos e novas. Farase chegar ao persoal docente unha guía didáctica para que os alumnos e alumnas poidan levar a cabo diferentes experimentos na aula. Ademais, a actividade formativa complementarase coa entrega dunhas gafas 3D ao alumnado, a través das que poderán adentrarse na realidade virtual do CINBIO e participar en xogos virtuais, ofrecendo así a posibilidade de visitar os laboratorios do centro sen necesidade de moverse das aulas.

‘Ciencia con C de CINBIO’ – 4 e 9 de novembro de 2021

Instalarase un stand nas cidades de Ourense e Vigo respectivamente. Neles haberá persoal do #teamCINBIO informando sobre que é o centro, as actividades que se fan nel e resolvendo todas as dúbidas dos transeúntes. Estas carpas estarán situadas en horario de 16:30h a 20:30h na Rúa do Paseo de Ourense (Ourense) e na Rúa do Príncipe (Vigo).

‘Portas abertas do Edificio Olimpia Valencia’ – 11 de novembro de 2021

Será o día no que o propio CINBIO abrirá as portas do Edificio Olimpia Valencia no Campus de Vigo a partir das 16:00h. Esta actividade consistirá nunha visita guiada polo propio persoal do centro, aderezada con charlas e experimentos en directo, e rematará cun pequeno pincho no exterior do edificio.

Inscrición (50 plazas)

‘Xincana científica’ – 13 de novembro de 2021

Pola mañá no campus de Vigo celebrarase unha xincana científica na que os participantes (baixo inscrición previa) poderán “correr” unha carreira de orientación con diferentes probas de temática científica.

Inscrición

‘ Xornada de portas abertas na Escola Superior de Enxeñería Informática’ – 18 de novembro de 2021

Por último, como colofón final, o 18 de novembro, días despois da semana da ciencia, pecharemos cunha actividade en Ourense: xornada de portas abertas na Escola Superior de Enxeñería Informática, onde teñen os seus laboratorios dous grupos máis do #teamCINBIO.

Inscrición

footer

PROGRAMA DE ACTIVIDADES DE DIVULGACIÓN CIENTÍFICA E TECNOLÓXICA Á SOCIEDADE DOS CENTROS DE INVESTIGACIÓN DA UNIVERSIDADE DE VIGO



logos footer

Programa Operativo FEDER Galicia 2014-2020
Promover o Desenvolvemento tecnolóxico, a innovación e unha investigación de calidade
"Unha maneira de facer Europa"